فى يوم ممطر

فى يوم ممطر ..وبعد انجلاء زخات المطر ..

ذهبت الى صديقى القديم..عجلاتى طويل القامة..ونحيل الجسد...

لا يكف عن التدخين..ودردمة السفة..

ينظر اليك بود ممزوج بالتهكم..يدعوك بحرارة الى كوب شاى من مطعم قريب..

وبعد فاصل قصير – او طويل- عن الغلاء وندرة السلع ورداءة التمباك الموجود فى السوق..يشرع فى الكلام..

عيونه تتحرك كثيرا اثناء الكلام..

يجرجرك الى نقاش فى كرة القدم..ثم يعرج الى السياسة العالمية دائما..لانه يقول انه مل الاشياء المحلية ويتطلع الى المستورد...

فى يوم ماء باغته بسؤال..مارأيك فى الحب؟؟

تنحنح وطالب كوب من الشاى..وبدأ بنفض كيس تمباكه ليهيىء سفة معتبرة وقال..

والله حقو تغير السؤال..

وفهمت انها محاولة منه لترتيب افكاره..

فاصررت عليه..ما هو الحب..

"يا ود ياسجم جيب الكباية الكبيرة.." صاح فى صبى المقهى..

ثم قال بسرعة..

       - الحب آبرى..

-         مافهمت

-         يعنى حلو مر

-         قصدك يعنى فيهو جزء حلو وجزء مر

حك ذقنه وقال..

يعنى خلطة غريبة عجيبة لا تستطيع تفتيتها..

انتبهت انه منمق الكلمات..

عندما راى الدهشة فى عيونى صاح مرة اخرى فى صبى القهوة..

-         جيب السجم يا سجم..

اتى الصبى ومزح معه..استلف منه عود ثقاب ثم مضى..

رشف رشفة طويلة واجتهد ان تكون مسموعة الصوت..ثم واصل

نحن بنحب ليه..ماعارفين..حاجة بتجذبنا الى الشخص من غير حسابات منطق..

هسى عليك الله كان عندى حبيبة بقعد معاك فى القهوة الخرابة دى..لا طبعا..لازم اكون معاها..

لكن الله كريم..

الله كريم افتتاحيته الى فتح موضوع السياسة العالمية..

فاسرعت اعيده الى الموضوع

-         لكن اليس الحب نوع من الجنون اذا كان يخالف المنطق؟؟

-         ابدا..ده منطق من نوع اخر..

-         كيف...

-         ماعارف لكن فيهو نوع من العقلانية الهادئة..

لاحظ دهشتى فاسرع وقال ..

-         ده البسمعو من اخوى بتاع الجامعة..زمن..

-         يعنى ما كلامك..

-         ايوه بس مقتنع بيهو

-         كويس جدا..

-         كمان فى حاجة..فى كلمة بالعاميه احسن من عبارة حب..وبتعبر عنو كويس

-         شنو؟؟

-         الريدة..هسى عليك الله ما ارق من من الحب..

-         احتمال..

-         اديك مثال..الكلمات اللى تبتدىء بحرف الحاء اغلبها حسية وغير محمودة..

-         لا لا كده انت بديت تنظر..

-         امسك واحدة..حرب..

-         وتانى؟؟

-         حقد..حمى..حر..حسد..

-         وتانى..

-         كتير انت ماقلت قريت جامعة..فتش ياخى..وخلى لينا نحن شغل العجلات..لكن...الله كريم..

قال الله كريم بصورة جدية..وفهمت انه لن يتراجع فى الدخول الى معمعة السياسة العالمية..

فانسحبت مستأذن..متعللا بميعاد وهمى...

مافى مشكلة..بكرة بحكليك راى فى حرب خليج الخنازير ايام كينيدى...

ثم صاح فى صبى المقهى ..

ياسجم..تعال شيل الكباية..